जिसस पर्वतको चुनाव - कागको मुखको मासु खोस्ने दाउमा काँग्रेस

 पर्वत । जिल्ला समम्वय समिति पर्वतको निर्वाचन आजलाई तोकिएको छ ।जिल्ला समन्वय समितिको संयोजकका लागि नेकपा एमाले र नेपाली काँग्रेस विच प्रतिश्पर्दा हुने भएको छ । नेपाली काँग्रेस तर्फ ६ र एमाले तर्फ ८ जना जनप्रतिनिधि छन् । नेपाली काँग्रेसबाट संयोजकमा कुनपा ७ का परशुराम पुरीले उम्मेदवारी दिएका छन् भने एमालेको तर्फदेखि दलित नेता मनोहर वि पौडेलले उम्मेदवारी दर्ता गराएका छन् ।

त्यस्तै काँग्रेसको तर्फदेखि सहसंयोजकमा लालकु्मारी सिकेको उम्मेदवारी परेको छ भने एमालेको तर्फदेखि  यामकुमारी रानाले उम्मेदवारी दिएकी छिन् । काँग्रेसको तर्फदेखि सदस्य पदमा कालीभक्त शर्मा (खुर्कोट), हरिबहादुर कार्की (माझफाँट) हरिमाया गुरुङ्ग (धाइरिङ्ग), लक्ष्मी आचार्य (बाच्छा), निर्मलाकुमारी शर्मा (शंकरपोखरी), मायाकुमारी शर्मा (धाइरिङ्ग) र खैसरा दर्जी (बर्राचौर) ले उमेदवारी दर्ता गरेका छन । त्यसैगरी एमालेको तर्फदेखि ज्ञानबहादुर भण्डारी, महाशिला गाउँपालिका १ का बिष्णुराम बिक, फलेवास नगरपालिका ठानामौलाकी कबिता बिक, मोदी गाउँपालिका ६ तिलाहारका नन्दलाल सुबेदी, जलजला गाउँपालिका लेखफाँटका ओमप्रसाद रेग्मी, विहादी गाउँपालिका रानीपानीकी बिष्णुमाया पौडेल र पैञ्यु गाउँपालिका हुवासकी शर्मिला नेपालीले उम्मेदवारी दिएका छन् ।

एमालेका जनप्रतिनिधिको संख्या दुइले बढि भएका कारण प्रत्यक्ष रुपमा एमालेले जित्ने पक्का छ । आन्तरिक रुपमा चलखेल नभए एमालेले बाजी मार्ने देखिन्छ तर काँग्रेस आफू अल्पमतमा परेता पनि जित्ने दाउमा छ । एमाले भित्रकै नेताहरुको  मतदानबाट आफूहरु विजयी हुने काँग्रेसले दाबी गर्दे आएको छ ।

जिल्ला समन्वय समितिको निर्वाचनमा स्थानिय तहका अध्यक्ष र उपाध्यक्षले मात्र मत हाल्न पाउने ब्यबस्था छ । पर्वतका २ नगरपालिका प्रमुख र उपप्रमुख तथा ५ गाउँपालिका अध्यक्ष र उपाध्यक्ष गरी १४ जनाले मतदान गर्नेछन् । जसमध्ये एमालेको पक्षमा आठ मत छन् भने नेपाली कांग्रेसका ६ मत छन् ।