वडा अध्यक्षका उम्मेदवार रिटायर्ड सेना भन्छन्– बाँकी जीवन समाज सेवामा

कुश्मा नगरपालिकाको शक्ति केन्द्र मानिने वडा ६ मा त्रिपक्षीय चुनावी भिडन्त छ । नगरपालिकाका १४ वडाहरुमध्ये जनघनत्व बढी भएको र साधनस्रोतबाट सम्पन्न यो वडामा कुन पक्षको जीत हुने हो भनी भन्न सकिने अवस्था छैन । यस वडाको अध्यक्षमा नेकपा माओवादी केन्द्रबाट रिटायर्ड सेना राम गिरीको उम्मेदवारी छ । 

हक्की, इमान्दार र प्रष्ट वक्ताको रुपमा चिनिएका सामाजिक व्यक्तित्व गिरीको अध्यक्षको उम्मेदवारीले मतदाताहरु खुशी भएका छन् । तपाईको अध्यक्षको उम्मेदवारीमा सर्वसाधारण खुशी हुनुपर्ने कारण के छ ? भन्ने प्रश्नमा उम्मेदवार गिरी भन्छन्–‘म भारतीय सेनाबाट रिटायर्ड भएको व्यक्ति हो । मलाई सामान्य जीवन यापनका लागि पुग्ने मासिक ४० हजार पेन्सन छ । मलाई सरकारी तलव र सेवासुविधा चाहिदैन र मैले लिन्न । मैले पाउने सुविधा जनताको सेवामा लगाउछु । दोस्रो मसँग वडाको विकास कसरी लैजाने भन्ने प्रष्ट योजना र अवधारणा छ । मैले भ्रष्टचार गर्दिन र गर्न पनि दिन्न । यसपछि मसँग सामाजिक विकास कसरी गर्ने भन्नेबारेमा अनुभव छ । म आफ्नो काममा ज्यान दिएर लाग्ने व्यक्ति हो । यी कुराले गर्दा वडा ६ का सर्वसाधारण मतदाता खुशी हुनुहुन्छ ।’ 

स्कुले जीवन पछि नै भारतीय सेनामा रोजीरोटीका लागि भर्ति भएका गिरीले आफ्नो बाँकी जीवन समाजसेवामा लगाउने ईच्छा यसरी व्यक्त गर्छन् –‘हेनुहोस्, म लडाईमा गोली थापेर पनि भाग्यले बाँचेको मान्छे हो । धेरै वर्ष विदेशी माटोमा विताए । अव भने म जन्मेको यही माटोमा केही गर्न चाहन्छु । जनताको सेवा भन्दा अरु मैले सोचेको पनि छैन ।’ 

रिटायर्ड भई आएपछि उम्मेदवार गिरीले सामाजिक क्षेत्रमा रही सेवा पनि गर्दै आएका छन् । उनी शिवालय बहुमुखि क्याम्पस व्यवस्थापन समितिका सदस्य हुन् । विभिन्न सामाजिक संघसंस्थामा आवद्ध भई समाजसेवा गर्दै आएका गिरीले सदरमुकामभित्रको प्रमुख भित्री सडकमध्येको शिवालयचोकदेखि प्रगती चोक कालोपत्रे निर्माण गर्दा उपभोक्ता समितिमा बसेर इमान्दारिताका साथ सक्रिय योगदान गरेका थिए । उनले बाटोघाटो, विदयालय निर्माण जस्ता सामाजिक कार्यमा अग्रपंक्तिमा रहि योगदान गरेका थुप्रै उदाहरण छन् । सामाजिक सेवाबाट नै स्वच्छ र इमान्दार व्यक्तिको पहिचान बनाएका अध्यक्षका उम्मेदवार गिरी बलियो प्रतिस्पर्धी मानिएका छन् ।

वडा ६ को अध्यक्ष उम्मेदवारमा नेपाली कांगे्रसका किशोर भण्डारी, नेकपा एमालेका रुद्र गिरी प्रतिस्पर्धाको लहरमा छन् । मतदाता संख्या करीव ७१० रहेको वडामा झण्डै ६०० मत खस्ने अनुमान छ । वडामा तिव्र प्रतिस्पर्धा हुँदै गर्दा २६० मत भन्दा बढी ल्याउने पक्षले बाजी मार्ने देखिन्छ । मतदाताले योग्य र सक्षम व्यक्ति वडाको अध्यक्ष हुनुपर्ने मनासय व्यक्त गरेको हुँदा आफ्नो जीत सुनिश्चित भएको उम्मेदवार गिरीको ठोकुवा छ ।