३५ वर्षको राजनीतिक जीवनमा उनले कहिल्यै लाभको पद हासिल गरेनन् । कहिल्यै राजनीति र जनसेवाभन्दा अलग बसेनन् । राजनीतिका सजिला र अप्ठ्यारा दुवै परिस्थितिमा उनको बाम राजनीति प्रतिको लगाव घटेन । तिनै सादगी जीवनका धनी, कम्युनिष्ट आदर्शका बिम्व मनबहादुर पौडेल मोदी गाउँपालिकामा माओवादी केन्द्रको तर्फबाट प्रमूखको प्रतिस्पर्धामा उम्मेदवारी दिएका छन् ।
पिता दानबहादुर पौडेल, माता रत्न कुमारी पौडेलको कोखबाट जन्मिएका ५४ वर्षीय पौडेल बाम राजनीतिक एक सदाबहार व्यक्तित्व हुन् । २०३८ सालमा नेकपा सर्वहारावादी श्रमिक संगठनको सदस्यबाट कम्युनिष्ट आन्दोलनमा क्रियाशील भएका उनी २०४७ सालमा एकता केन्द्रको सदस्य हुँदै २०५६ संयुक्त जनमोर्चा नेपालको तर्फबाट सांसदमा उम्मेदवारी दिएका थिए । बामपन्थी जनमत बढाएको र कम्युनिष्ट आन्दोलनमा लागेको अभियोगमा उनी पटकपटक गिरफ्तार भई जेल जीवन बिताएका थिए । तर, त्यसबाट उनी कहिल्यै पनि बिचलित भएनन् ।
२०६२÷०६३ सालको जनआन्दोलनमा जनसागर उतार्न उनले निकै मेहेनत गरे । श्रमप्रति विश्वास गर्ने, निष्ठा र त्यागलाई नै राजनीति ठान्ने उनी कहिल्यै प्रलोभनमा परेनन्, निष्ठा बेचेनन् र प्रजातान्त्रिक र पुरातनपन्थी खेमाबाट गरिएका अवरोधसामू गलेनन् । हाल नेकपा (माओवादी केन्द्र) को केन्द्रीय महाधिवेशन आयोजक समिति सदस्य र अखिल नेपाल किसान संगठन क्रान्तिकारी केन्द्रको केन्द्रीय सचिवालय सदस्य समेत रहेका उनी माओवादी केन्द्र मोदी गाउँपालिकाका अध्यक्ष पनि हुन् । त्याग, निष्ठा र समर्पणकै कारण माओवादी केन्द्रले पौडेललाई गाउँपालिका प्रमूखको उम्मेदवार बनाएको छ ।
उनमा कुनै तडकभडक छैन । सादा जीवन जिउन मन पराउँछन् उनी । षड्यन्त्र, जालझेल, गुट निर्माण र छक्कापञ्जा उनी जान्दैनन् र रुचाउँदैनन् पनि । जति गर्छन्, आफ्नो निष्ठा र स्वाभिमानकै बलमा गर्छन् । राजनीतिका ठूला कुरा गरेर श्रमप्रति पिठ्यू फर्काउने राजनीति उनलाई मन पर्दैन । परिवार र राजनीतिको उनको आफ्नै तालिका छ, त्यही तालिकामा चल्छन् पौडेल । राजनीति, समाजसेवा, श्रम र परिवारको व्यवस्थापन सबै कुरामा आफूलाई अभ्यस्त बनाउँछन् ।
स्थानीय तहको चुनाव आयो, कांग्रेस, एमालेका नेताहरु टिकट माग्न नेताहरुको दैलो ढुके, गुट बनाए, धर्ना दिए । तर, उनी शान्त तलाउझैं पार्टीले दिएको जिम्मेवारीमै क्रियाशील भए । अन्ततः पार्टीले उनको योगदानको कदर गर्यो र प्रमूखको उम्मेदवार बनायो । यिनै मृदुभाषी, शान्त स्वाभाव, शालिन र सदाबहार कम्युनिष्ट आदर्शका बिम्व मनबहादुर पौडेल अहिले प्रमूखको उम्मेदवारका रुपमा जनताको दैलोमा पुगिरहेका छन् ।
मतदातालाई उनले ठूलो सपना बाँडेका छैनन्, जे सकिन्छ त्यो मात्र बोल्छन् उनी । जितेपछि के गर्नुहुन्छ त ? पौडेल भन्छन्, ‘म एक किसानको छोरो, कृषिमार्फत् आत्मनिर्भरता र रोजगारी सिर्जना मेरो पहिलो दायित्व हुन्छ । गाउँपालिकाका मूख्य सडकहरु कालोपत्रे गर्ने योजना छ, सडक नपुगेका ठाउँमा सडक सञ्जाल बिस्तार गर्छु । खानेपानी, सिंचाई, नदी नियन्त्रण मेरो प्राथमिकतामा छ, स्थानीय साधन स्रोतको उपयोग र परिचालनको वैज्ञानिक नीति बनाउँछु । किसान, युवा, दलित र महिलाहरुको जीवन स्तर उकास्न, रोजगारी सिर्जना गर्न र अवसर प्रदान गर्न विशेष कार्ययोजना ल्याउँछु ।’
पौडेल थप्छन्, ‘मोदी गाउँपालिका उर्जा र पर्यटनका दृष्टिले धेरै सम्भावना बोकेको ठाउँ हो । जलविद्युतको सही व्यवस्थापनको नीति बनाउँछु, उत्पादनको प्रक्रिया अघि बढाउँछु । होमस्टे, पर्यटन पदमार्गको विकास, पर्यटनमैत्री पूर्वाधार, जनचेतना र आकर्षणका विविध कार्यक्रम अघि सार्छु । शिक्षा र स्वास्थ्यमा पूर्वाधार खडा गर्छु, गुणस्तर अभिवृद्धि गर्छु । अरु कुरा हाम्रो पार्टीले २७ बूंदे प्रतीज्ञा पत्रमा उल्लेख गरेको छु, त्यसको कार्यान्यवन गर्नु नै मेरो मूख्य लक्ष्य हुनेछ ।’
मोदी गाउँपालिकाको प्रमूख दावेदार शक्ति कांग्रेस, एमाले र माओवादी केन्द्र नै हुन् । अहिले मोदी गाउँपालिकामा केन्द्रको तर्फबाट २५ करोडभन्दा बढी बजेट आएको छ । ती सबै योजनाको अनुगमन गरिरहेका छन् पौडेल । पौडेल भन्छन्, ‘केन्द्र र स्थानीय स्रोतको तालमेलबाट गाउँपालिकालाई समुन्नत बनाउँछु । यो नै मेरो अबको सपना हो ।’ आफ्नो सफलतालाई सार्थकतामा बदल्न उनलाई सफलता मिलोस्, पौडेललाई मेरो पनि शुभकामना ।
यस बिषयमा तपाइको प्रतिक्रिया...!